PH football

[Riversboy]

Me and my palis go
Hotel Aristo
because we know dem go dey show
all di football wey go dey go on
for England and Europe
if you dey find me, make you hope
sey Barcelona no go play
and dat di Gunners no go dey
if not you no go see my face
unless you go di place
where dem dey play dat sweet football
I no go answer if you call
my phone
our business dey postponed
di money wey I loan you
pey am monday
when Champions League no go come dey.

Di club wey I love pass
na Port Harcourt Sharks
but I no fit watch dia match
for telly so I don dey spark
for all di stations
for we nation
dem no fit show our premier league
but dem fit show Serie A league
E dey pain me!
If dem pay me,
me I go tape di match myself
and commentate di match myself.
"Sharks dey hold di ball.
Enyimba goalie fall.
Striker enta box
he tries a shot
a chance for Sharks...
GOAL!"